මුතුරාජවෙල පර්යන්තයේ නව ඉන්ධන ගබඩා ටැංකි තුනක් ඉදිකිරීම සඳහා කොන්ත්‍රාත්තුව පිරිනැමීමට අමාත්‍ය මණ්ඩල අනුමැතිය හිමිව තිබෙනවා.

ලංකා ඛනිජ තෙල් තොග ගබඩා පර්යන්ත සමාගමේ අරමුදල් යොදා ගනිමින්, ඝනමීටර 15,000 බැගින් වූ ඉන්ධන ගබඩා ටැංකි දෙකක් සහ ඝනමීටර 10,000 ක ඉන්ධන ගබඩා ටැංකියක් ඉදිකිරීම සඳහා 2025 ජුනි 02 වැනිදා පැවැති අමාත්‍ය මණ්ඩල රැස්වීමේදී අනුමැතිය ලබා දී තිබුණා.

ව්‍යාපෘතිය ක්‍රියාත්මක කිරීමේදී පාරිසරික හා නෛතික අවශ්‍යතා සපුරාලීම සම්බන්ධයෙන් ද අදාළ පියවර ගෙන තිබෙන බවත්, මධ්‍යම පරිසර අධිකාරිය විසින් නියම කර ඇති නිර්දේශ හා කොන්දේසි ද ප්‍රසම්පාදන කොන්ත්‍රාත් ගිවිසුමට ඇතුළත් කර ඇති බවත්, වන සත්ත්ව හා වෘක්ෂලතා ආඥාපනතේ විධිවිධානවලට අනුකූලව ව්‍යාපෘතිය ක්‍රියාත්මක කරන බවත් බලශක්ති හා පරිසර අමාත්‍යවරුන් විසින් අමාත්‍ය මණ්ඩලය දැනුවත් කර ඇති බවයි සඳහන් වන්නේ.

ජාත්‍යන්තර තරගකාරී ලංසු කැඳවීමේ ක්‍රමවේදය යටතේ, ලැබුණු ලංසු අතරින් ඉහළ මට්ටමේ ප්‍රසම්පාදන කමිටුව විසින් නිර්දේශ කරනු ලැබූ සාරානුකූල ප්‍රතිචාරාත්මක අවම ලංසුකරු වන M/s Indo-East Engineering & Construction (Lanka) (Private) Limited සහ Ceylex Engineering (Private) Limited Joint Venture වෙත අදාළ කොන්ත්‍රාත්තුව පිරිනැමීමට අනුමැතිය හිමිව තිබෙනවා.

ඒ අනුව, අදාළ කොන්ත්‍රාත්තුව ඇමෙරිකානු ඩොලර් මිලියන 3.04 ක් සහ ශ්‍රී ලංකා රුපියල් මිලියන 2,796.14 ක් වන මුදලකට, එකතු කළ අගය මත බදු රහිතව පිරිනැමීමට බලශක්ති අමාත්‍ය අනුර කරුණාතිලක ඉදිරිපත් කළ යෝජනාවට අමාත්‍ය මණ්ඩල අනුමැතිය හිමි වී ඇති බවයි සඳහන් වන්නේ.

අදාළ කැබිනට් තීරණය පහතින්.